متخرج ومجرب ( ريناد تحكي تجربتها ونصائحها لسنة التحضيرية ) 🎀💙

مقالة عنوانها ( متخرج ومجرب ) 🎀💙

#TWAS




 ريناد مسعد الأحيوي
بكالوريوس الكيمياء الحيوية
جامعة الملك عبد العزيز
سفيرة من سفراء تواس حابة في البداية أشكرهم لأني استفدت من عطائهم لمن كنت تحضيري وأيضا لأنهم أتاحوا ليا فرصة عرض تجربتي 💓




المقدمة💓
-نصايح دينية🕋
-نصايح للحياة الجامعية👩🏻‍🏫
-تنظيم الوقت⏳🤳🏼
-المذاكرة💯
-الأندية والتطوع🤹🏽‍♀


بداية لكل مرحلة من مراحل الإنسان طعم ولذة
ومرحلة التحضيري مرحلة جدا رائعة وممتعة
تجربة جديدة .... روتين جديد..... صداقات جديدة.... حتتعلموا منها
غير كدا عندكم تحدي إنكم تجتهدوا عشان تجيبوا معدل عالي وتتسكنوا في الكليات إلي تبغوها...
قرب وقت تحقيق الحلم 😍💜
حتستمتعوا 💓وتنبسطوا 😃وتنجزوا 💪🏾
حتحسوا السنة تمشي بسرعة حتقولوا يالله دوبنا كنا تحضيري مستجدات  مسرع خلص الترم التاني  ...
عشان كدا حقولكم من واقع تجربتي مع السنة التحضيرية كيف تسغلوها صح بإذن الله 💪🏾😍




أولا النصايح الدينية🕋❤

1. *اتوكلي على الله -عز وجل-*
اكيد لكل شخص أهداف وأحلام محا يقدر ينجزها بدون مساعدة هنا تكمن أهمية التوكل
كيف تحققي أمنيتك بالتوكل على الله💘 محا يسعني الوقت إني أتكلم عنو لكن حأضع في يدك حلقة الشيخ مشاري الخراز المقطع أقل من 12 د✨
https://youtu.be/fCUFt2K1JZI
طبقي إلي فيها وبإذن الله حتتغير حياتك تغير جذري

2 . *وردك من القرآن*
لا تهمليه لو ايش ما سار لو صفحة
(قليل دائم خير من كثير منقطع) ما تدري قدي ايش مهم حتلقي بإشراف في صدرك💜 حتلاقي بركة ف وقتك.... حتنجز  أشياء ما كنتي تتوقعي إنك تسويها ف يومك 💪🏾
و ف دي الأيام سار موضوع الحفظ ميسر بفضل الله ويوجد تحفيظ  وحلقات عن بعد عن طريق الواتس أب
إذا أحد حاب يتواصل معايا ع الخاص

3 . *أذكار الصباح و المساء*
محا تآخد منك أكثر من10 د بمثابة الدرع  الحصين المتين
شخص يذكر الله صباح ومساء *أيضيع !*
4. *الوتر*
في نهاية يومك استودعي الله أمنياتك في دعائك بأشياء تبغيها في الدنيا والآخرة
في الحديث... (أوصاني خليلي بثلاث ركعتي الضحى وأن لا أنام إلا على *وتر*وصيام ثلاثة أيام من كل شهر )رواه أبو هريرة.


ثانياً نصائح للحياة الجامعية :


 كوني إيجابية وأبتعدي قدر المستطاع عن المتشائمين لاا تسمعي 🔇أبدا للي يقولك " الدكتورة الفلانية ما تعرف تشرح " و "المادة الفلانية صعبة" و غيرها من العبارات السلبية لا تكوني دلو 🚮كل من جاك عباك

انتي تقدري بإذن الله طالما عندك عزيمة وتوكل حتتخطي كل العقبات حطي نص الحديث القدسي في بالك😃 (أنا عند ظن عبدي بي أن ظن خيرا فله وان ظن شرا فله  )

ضعي عبارات إيجابية تحفزك وتخليكي تمشي للأمام دايما وردديها كل ما حطيتي في بالك شي عقلك اللاواعي حيبدأ ينفذه

اكثري من قول (لا حول ولا قوة الا بالله)

لا تبخلي أبدا بمساعدة الآخرين👥 عندك معلومة ،فائدة ،أي شي ممكن يساعد شخص أو يسعده قدميه دا الشي ينعكس عليكي من دون ما تحسي حتكوني سعيدة دايما طالما ساعدتي الناس حتلاقي الخير في وجهك دايما النبي صلى الله عليه قال( أحب الناس إلى الله أنفعهم ) في حديث آخر (خير الناس أنفعهم للناس)


كوني مبتسمة😃دايما لو ايش ما حصل حتقتدي بحبيبك صلى الله عليه وسلم وف نفس الوقت حتكون صدقة لكي ف يومك
(تبسمك في وجه أخيك صدقة)



ثالثاُ لتنظيم الوقت⏰⌚

كونك في مرحلة جديدة أكيد روتين حيتغير في الثانوي كنتي ترجعي الظهر دحين الأغلب بيقعد للعصر فحتحتاجي تعيدي ترتيب أولوياتك في يومك

لو حتكلم عن تنظيم الوقت محا يسعني الوقت إني أديه حقو
لكن حقولك نقطتين مهمة 📋
1 . أهم نقطة انك تراقبي وقتك بمعنى انك تعرفي وقتك فين بيضيع
جيبي ورقة📝 واكتبي وقت البداية ووقت النهاية مثلا نمتي 😴... اكلتي🍔🍟🍌 .... قعدتي ع الجوااال📱 ... إلخ

وف نهاية يومك شوفي الوقت الي استغرقتيه في الفعل وحتعرفي وقتك فين بيضيع فعليا وهل هوا شي مفيد وحيساعدك على التقدم ولا لا

2. تاني شي جيبي نوتس📗 واكتبي فيها الأهداف إلي تبي تحقيقها في دا اليوم
نقطة مهمة لمن تجي تبي تكتبي الأهداف لا تكتبي هدف مفتوح🔓 مثلا
أذاكر مادة الرياضيات📐📏
أقرأ الكتاب الفلاني📖
حددي المقدار إلي تبي تنجزيه
مثلا أذاكر من صفحة 50 إلى 60  من مادة الرياضيات
دا الشي حيحمسك انك تنجزي وكل ماجاكي فتور تتذكري انك قربتي من الهدف إلي كتبتيه

واكتبي في اليوتيوب وقوقل تنظيم الوقت وشوفي النصايح و اتبعيها كل العظماء 🔬✒عندهم نفس وقتنا 24 ساعة
لكن الفرق بيننا وبينهم أنو هما عرفوا كيف يستغلوا وقتهم  صح وينجزوا

متأكدة واثقة إنك في يوم حتسيري زيهم بإذن الله👌🏾




رابعاً  للمذاكرة📚📑

أهم شي لازم تعرفيه أنو التحضيري مختلف تماما عن الثنوي هنا حتخوضي  تحدي أكبر ✊
حتثبتي لنفسك إنك تقدري بإذن الله وبقدر جهدك ربي محا يضيع لك ذرة تعب وحيعطيكي أكثر مما تصوري بس اعقليها واتوكلي عليه خدي بكل الأسباب ولا تقصري مع نفسك حتفرحي لمن تشوفي الإنجاز
أتذكر
( تعب العلم لحظة ويزول ..... وندم الجهل الدهر كله)
- اولا بقد ماتكوني ملمة بكل شيء وماتحاولي تراكمي المحاضرات هذه أهم حاجة 👌🏼✨.

- أستغلي أوقات البريك غالبًا أنتو التحضيري عندكم بريكات طويلة فأستغليها بأنك تراجعي المحاضرات إللي أخذتيها أو النقطة إللي مافهمتيها وقت المحاضرة عشان لاتأجليها لوقت المذاكرة الفعلية مره يفرق إذا فهمتيها قبل ، وأكدتي عليها قبل الإختبار كذا بتمشي أمورك تمام وبتشوفي درجات حلوه 💕🌟.

- طبقي إستراتيجية 50 دقيقة مذاكرة ، 10 دقائق راحة ، مرره ممتازة وبتنجزي أكثر في المذاكرة لو طبقتيها ، مثلاً  في الـ 50 دقيقة تحددي باب ونص ، باب وتمارين وهكذا ، والـ 10 دقائق راحة طبعًا وبعدها ترجعي وتحطي المنبه على 50 دقيقة وتحددي الجزئية إللي بعدها🕐📖✨.
فيه برنامج حرسل صورتو أفادني

 أخيرًا . .
- أهم شي قبل ماتدخلي أي إختبار لاززم تكوني نايمه كويس وفطرتي مره يفرق معاكِ وإنتِ بتختبري 💙🌟 ، عكس لما تروحي مواصلة وفيكِ نوم😴 وجوعانة🍱 ❌ .

- واشربي موية قدر المستطاع🍶 فترة  إنتاجي زاد 👍🏽وخف الصداع
اذا انتي من النوع إلي ينسى حطي منبه ⏰أوحملي أبلكيشن

- ونصيحة حاولي لا تخشي قروبات المواد ليلة الإختبار لو عندك أسئلة أو شي اطرحيها من قبل بيوم دخولك للقروبات ممكن يوترك وفيه ناس بتدي رسايل سلبية وف نفس الوقت حيضيع وقتك الي ممكن تستغليه في المراجعة بدل ما تدخلي الواتس ❌

-وفيه بعض الجامعات عندها مواقع تفاعلية تدرك على الإمتحان وكمان اطلعي على أسئلة سابقة وأسئلة الدفع إلي قبلك

وبالتوفيق لك يا جامعية وعام دارسي ناجح بإذن الله 📚🌟!
وحطي ف بالك ربي محا يضيع لك ذرة تعب🤗❤
أعطي التحضيري سنة من عمرك تديكي العمر كلو ✨


خامساً للتطوع والأندية

أستغلي بريكاتك وأوقات فراغك🕛 في الإشتراك في الأندية إلي تفتحلك باب التطوع داخل وخارج الجامعة ومساعدة واسعاد الآخرين 🙌🙋
وكمان حتساعدك على التطور وتخليكي فعالة في المجتمع

أمثلة للأندية الجامعية ..نادي الفنون 🎨..  الأدبي✒📜 ..  الرياضي⚽ .. القرآني📖 .. المسرحي 🎥🎬

لا تهملي هواياتك بل نميها

كافئي نفسك على كل شي تسويه دا الشي حيساعدك على الإنتاجية



حديكم النصيحة الأخيرة كنت اتمنى أحد يقولي هيا لمن كنت تحضيري
حطي كذا خيار للتخصصات وتخيلي نفسك في كل التخصصات وحبي كل التخصصات في مسارك
نحنا بداية السنة لا تقتصر على تخصص واحد واعطي لنفسك فرصة البحث عن تخصصات تناسب ميولك سوي اختبارات تحديد الميول أقرأي عن التخصصات الأخرى أحيانا الشخص يشوف نفسو في شي معين وبعدين يكتشف جوانب أخرى لشخصيتو حتخليه يحب تخصص تاني
بس هوا ما اكتشفها من بدري
ربي حطني في كلية العلوم في تخصص الكيمياء الحيوي عمري ما قرأتو ولا بحثت عنو كانت نظرتي لتخصصات معينة فقط
اول ما طلعت نتيجة التسكين ولقيتني انقبلت في كلية العلوم حزنت بس
بعد فترة شفت نفسي في التخصص دا وحمدت الله انو حطني فيه وعرفت انو خيرة
 اي تخصص ربي يحطك فيه هوا الخير لكي لمن دخلت التخصص وشفتو ممتع وحبيتو كدا قلت ياليتني قرأت عنو من ايام التحضيري وعرفت ايجابيتو  عشت معاه سنة كاملة ويوم عن يوم أحبو واستمتع بيه
اي شيء تحتاجوه لاتترددوا عيوني لكم 💜


استمتعت وانبسطت معاكم 😍😍 وعقبال ما اشوفكم في أعلى المناصب يارب وتحققوا إلي تبغوه ✨✨

وبختام هذي الفقرة أتمنى تكونوا استفدتو معانا 😍❤

ضيفنا العزيز واعضائنا الأعزاء
نبغى نعرف إنطباعكم عن الفقرة سواء بفائدة أو كلمة أو ما يخطر في أذهانكم📝

شاركونا في هاشتاق :

#متخرج_ومجرب

🔹بالنسبة للخريج أكتب اسم قروبك وانطباعك عنه
🔹بالنسبه للطلبة اذكرو اسم خريجكم والتخصص

تغريدة وحده راح تفرق  👏💜