مقالة عنوانها ( متخرج ومجرب ) 🎀💙
#TWAS
أنا دارين اشقر
سنة رابع طب مختبرات بكلية العلوم الطبية التطبيقية
طيب ايش قسم طب المختبرات؟
قسم من أقسام الطب، يكون فيه مسؤول عن إستلام التحاليل، إختيار التحاليل التشخيصية والفحوصات المناسبة، تحليلها وإدخال النتائج على النظام. كما أنه يكون مسؤول عن إدارة المختبر وضمان الجودة بإستمرار
مدة الدراسة:
٤ سنين بالإضافة إلى سنة الإمتياز ( التدريب بالمستشفى)
طيب دورنا بالزبط بالمستشفى؟
١- الدكتور يشوف حالة المريضه والأعراض اللي بتشتكي منها
٢- يطلب عينات تاخدها الممرضة، الدكتور أو في بعض المستشفيات احنا
٣- تترسل على مختبر المستشفى وتبدأ تتقسم العينات حسب الفحص المراد عمله إلى الأقسام المختبرية المختلفة
٤- ناخد العينات نفرزها ونحللها بعدين نطلع النتايج ونكتبها بحيث يفهمها الدكتور ونرسلها لو وبكدا تنتهي مهمتنا بإذن الله
٥- على أساس تحليلنا الدكتور حيصرف الدواء، يطلب فحوصات أكتر أو يتخذ إجراءات مهمه أخرى
أقسام طب المختبرات كتييييييره جداً منها:
١- قسم الكيمياء الحيوي
الناس اللي كانت تحب الكيمياء في الثانوي او العلوم بشكل عام حيحبوا دا القسم.
شايفين الانابيب الملونه؟
كل لون من الألوان تعني حاجه معينه او اختبار معين. ومعظم الأنابيب دي تترسل على قسم الكيمياء للفحوصات وهما اكتر قسم تجيهم عينات.
في دا القسم يجيهم تحليل فيتامينات، هرمونات وإلى آخره من التحاليل 
٢- قسم علم أمراض الدم
من الأقسام الرائعة اللي تعتمد غالباً على الفحص المجهري عشان تشوف أشكال الخلايا المختلفه سواء كانت طبيعية او غير طبيعية، نسجل النتايج ونرسلها.
في دي الصورة الخلايا الصغيره هيا خلايا الدم الحمرا، الكبيره اللي في النص نوع من انواع خلايا الدم البيضاء
٣- قسم الكائنات الدقيقة.. اكثر قسم فني بالمختبر
قسم الكائنات الدقيقه
يعتمد غالباً على إننا نعمل "مزارع" للبكتيريا عشان تنمو ونشوفها بعد كدا تحت المجهر
شايفين كل لون من الأولان اللي على المزرعه؟
تمثل نوع من الاف انواع البكتيريا، الفطريات
كمان القسم متعلق بالفايروسات 
هذي كمان صورة تقريبية لبكتيريا المعدة برضو من اختصاص قسم المايكرو " الكائنات الدقيقة"
٤- قسم الطفيليات (الديدان)..
من أروع الأقسام اللي مرت عليا في التدريب
دا القسم مختص بمعرفة أنواع الطفيليات اللي موجود بالعينه
اللي شايفينو هيا دوده تعيش في الأمعاء اسمها "اسكارس" تتغذى على اللي بناكلو وتعتبر اكبر دوده بعلم الطفيليات 
٥- قسم التشريح
اللي يحب التشريح مو شرط يدخل طب.. عندنا بقسم طب المختبرات توصلنا عينات أو اعضاء كامله للتشريح
-نعاينها، نقطعها حتى النسيج يسير شريحة شفافة جداً زي اللي في تاني صورة بعدين نشوفها تحت المجهر كخلايا زي اول صورة
فاتخيلوا من طبقه كبيره من العضو، خليناها شريحه شفافه عشان نقدر نشوف الخلايا طبقه وحده نحيييفه جداً
الصوره الأولى اللي في النص تمثل خلايا الجلد وهيا من اكبر الخلايا.
٦- قسم الوراثة
هوا قسم ما يعتبر جديد لكن معلوماتو بتجدد وقيمه جداًً جداً
اللي له في البرمجة- الدقه والإخلاص في العمل وكمان شوية برمجة. حيحب دا القسم كتيير
هنا نقدر نشوف الجينات الطبيعيه في جسمنا وكيف تسير الطفره الجينيه وكيف نتوقع يكون عند دا الشخص مرض معين على قدام وكيف ممكن نتخذ اجراءات لمنع المرض.
فلو احكيكم على القسم لين بكره ماحخلص من كثر المعلومات اللي موجوده فيه
٧- قسم بنك الدم
كيف نقدر نساعد الناس اللي عندهم لا قدر الله سرطان أو سارلهم حادث ويحتاجو دم أو بلازما؟
هنا الحل بعد الله 
التبرع بالدم
نستقبل أكياس الدم من المتبرعين ونحللها عشان نتأكد إذا مافي حاجه ممكن تضر المريض زي الفايروسات المستخبية او البكتيريا الضاره وبعدها نشوف اذا كانت فصيلتو مطابقه للمريض ونديلو هيا بكل اطمئنان
٨- مختبر الانجاب (IVF)
هوا مختبر مختص التلقيح الاصطناعي وهكذا
المختبر عليه دخل مره كتير 
لكن مررره مررررره حساااس ويبالو ايادي خفيفه
بعد الله ممكن تكون السبب فإنك تخلي ناس ما يقدروا ينجبوا يجيهم بيبي
القسم متعلق بالوراثه نوعاً ما. اول شي لازم نعرف السبب ورا عدم الخلفه بعدين دي طريقه من الطرق اللي نحل المشكله
ممكن يكون بسبب ضعف الحيوان المنوي او في حاجه في البويضه فبالتالي نعمل التلقيح برا وبعدين نرجع نزرعو في الرحم
طيب نجي أخيراً لفرص العمل وتتضمن:
-قسم المختبرات بجميع المستشفيات والمراكز الصحية والمدن الطبية
-المراكز البحثية الطبية والمختبرات الوراثية ومختبر التخصيب ومعالجة العقم
-المنشئات التعليمية كالمدارس والجامعات
-مراكز الأدوية والسموم
-الشركات الطبية
الاسئلة:
ايش الصفات اللي من متطلبات التخصص؟ (فهم/حفظ/سرعة بديهة...)؟؟
يفرق من قسم لقسم.
مثلاً في قسم يتطلب حفظ أشكال الفيروسات والبكتيريا اكتر وهكذا.
لكن ايش ما كانت هادي الصفات الواحد يقدر يتحلى بيها ويقدر يكتسبها بالممارسة.
انا الى الآن ما عندي سرعة بديهه لكن ناجحه في قسمي بأشياء كتيره ولله الحمد
فلا تحطي هادي المتطلبات كحواجز لأنهم مجرد اشياء وليست فعلاً متطلبات ازا تجي بالممارسة 
🏼
يعني تصيروا مخزنين الدم عندكم صحيح؟
- صحيح لكل قسم من اقسام الدم لو وقت معين يتخزن في بعدين ما نقدر نستفيد منو حاجه
مثلاً خلايا الدم الحمراء تعيش لمدة تلاته شهور فقط بعدها تبدأ تخسر وظائفها و'تعجز' فبالتالي محا تقدر تفيدنا
- في حاجات في البلازما ما تقدر تعيش اكتر من تلاته ايام فلازم نستغلها قبل ما تروح من الكيس او تخسر وظيفتها.
لكن عندنا في المستشفيات تلاجات مره كبيره نحتفظ بالدم واقسامو فيها
كمان تفيدنا للأوقان الطارئة مثلاً انسان سارلو حادث لا قدر الله عندنا كيس دم جاهز نديلو هيا وبكدا يسير ننقذو. عشان كدا المستشفيات بتطلب متبرعين باستمرار عشان يكون عندنا مخزون كافي لدي الحالات
دحين لما الشخص يتبرع بالدم ممكن ف الوقت الحالي م تحتاجو كيف تحافظو عليه فترة اطول؟! ولا م ينفع؟
بعض اقسام الدم تحتاج درجة حراره معينه عشان وظيفتها ما تخرب فعشان نحافظ عليها نقسم كيس الدم لاقيامها
- بلازما
- خلايا حمراء
- خلايا بيضاء
ونحط كل قسم من الاقسام في درجة بروده معينه عشان نحفظها وقت ما نحتاجها
وبختام هذي الفقرة أتمنى تكونوا استفدتو معانا 😍❤
ضيفنا العزيز واعضائنا الأعزاء
نبغى نعرف إنطباعكم عن الفقرة سواء بفائدة أو كلمة أو ما يخطر في أذهانكم📝
شاركونا في هاشتاق :
#متخرج_ومجرب
🔹بالنسبة للخريج أكتب اسم قروبك وانطباعك عنه
🔹بالنسبه للطلبة اذكرو اسم خريجكم والتخصص
تغريدة وحده راح تفرق 👏💜
